雞?你仲衰過做雞!

0
1204

近日所見,不少自稱基督徒的建制派參選人,高調將「維護家庭」、「一男一女」,

作為佢地嘅競選宣傳口號或政綱。佢地嘅用意都相當司馬昭,顯然係要爭取較保守嘅選民支持,特別係基督徒嘅票源。

華人教會傳統一向對性方面的罪比較敏感,例如與未信者拍拖、同性戀、離婚、再婚、婚前性行為、召妓在教會圈子當中都會被覺得係一件好羞恥、好嚴重嘅罪,大部份華人堂會更加會停事奉、停聖餐。其實在教會論的神學上,停聖餐等同唔再承認當事人係教會一份子了,同趕出教會係無分別,可謂罪大惡極。

其實,教會係按乜野標準去決定罪嘅嚴重性呢?難道貪心、虛偽、驕傲、愛世界、欺壓人等罪,會比性有關嘅罪輕微,這些罪就不需要作任何紀律處分?

創世記38章有這樣的一個故事:猶大的長子娶了妻,名叫她瑪,但沒有生子便死了。按當時習俗,弟弟要娶嫂子為妻,目的除了是為兄長留名立後之外,亦係要保障寡婦的需要。但做細佬的俄南唔想幫亞哥立後,行房時唔肯中出,於是神也使俄南死了。猶大見她瑪原來係個劏豬凳,雖然仲有一個拉仔,但怕俾呢個女人黑死埋,為免自己冇仔送終,只好打發她瑪返老家,然後不了了之。

猶大怕自己利益受損,收起自己嘅兒子,但就虧待咗她瑪,冇去為一個寡婦給予應該的保護,可以話係損人利己嘅所為,衰格嗎?

後來,猶大自己都喪妻了,有一日,同朋友開完party,响Market Place見到個女人,以為係企街,不過冇帶錢响身,於是就交低咗個圖章、褲帶同支stick,做住當頭,叫個妓女搵日上來收返尾數。好奇怪,隔咗好多日,都無妓女搵上門追數,於是猶大又不了了之。

其實,個妓女係佢新抱她瑪假扮的,因為見到老爺遲遲冇叫個拉仔娶返自己,惟有出此下策,希望向佢老爺取種生子。後來她瑪果然懷了孕。

當猶大知道自己個新抱竟然守寡期間大咗肚,當然暴跳如雷,吩咐人要將她瑪活活燒死。她瑪亦早料會有此一日,隨隨出示手中嘅當頭。最後,猶大承認說:「她比我更有義。」

她瑪雖然不是正式妓女,但所做嘅事畢竟係唔道德,講出來都核突。但係相比於猶大,唔肯將她瑪應得的給予她,亦冇為一個弱勢女子提供應當的保護,損人利己,所以猶大自己承認:「她比我更有義」,用今天俗語講即係「我仲衰過做雞」,相信這亦是聖經作者給予的評價。

今日,香港社會充滿欺壓之事,利益集團做盡各種損人利己之事,按創世記之標準來說,簡直係衰過做雞!

那些so called基督徒建制派參選人,只懂高舉維護所謂家庭價值,並以此作為競選宣傳技倆,卻無視今日港共政權之倒行逆施,並甘作護航。老實講,雖然我們都反對同性婚姻、離婚、婚前性行為,但這些事還是不至影響到其他人,屬私人嘅事,並冇令其他人招致損失;相反,那些壓逼之事,卻令無數人生活艱苦,與搶掠無異。按創世記之標準來說,這些基督徒參選人一樣係衰過做雞!