對於一般人黎講，「執事」呢個字眼最多只是會諗起「黑執事」呢套動漫，對於教會中「終身執事」呢個概念可能都會比較陌生。但是，對於有「終身執事制」的教會黎講，可能是好事，但同樣極有可能是一場惡夢。究竟咩是「終身執事」？呢樣野又有幾大程度影響著教會？
首先，做得「執事」，在教會必定要有不少的年資，「執事」這回事是特重年資的。所以「執事」可算是教會裡平信徒的「大佬」，一間教會可以由2－3位至10多位不等，視乎教會人數而定，一般都由會友以信任票制選出。「執事」既然是「大佬」，就自然擔起不少決策工作，當然事務上事無大小都可以管。所以，「執事」不僅是有威望咁簡單，在教會中更有決策力，連傳道人請邊個佢都有份話事。其實呢，最簡單一句，就是教會的 Old Seafood。
咁「終身執事」呢？其實都只是「執事」，不過加埋「終身」，即是成世你都是「執事」直到你上天家，真是「一日執事、終身執事」呀。其中，「終身執事」通常仲有「開山元老」之意，亦即是通常是教會初建的第一代開國元老。睇住教會大（睇住教會壞？），經驗豐富是真的，所以普通「執事」都總會讓佢幾分（喂，開山元老喎，邊個夠膽得罪呀？）。所以點解話「終身執事」是「教會山寨王」就是咁解：教會的核心外與內圍都由佢操控、唔會有人監察到佢、佢提出的意見幾乎無人敢質疑、連傳道人請邊個佢都有份話事－咁仲唔係山寨王是乜？
咁呢個「山寨王」可以點影響教會？剛才已提到「執事」與「終身執事」的威力，由是可見，佢的覆蓋面可滲透教會方方面面。教會的所有重要決策，例如堂會的方向、發展、或者是成日出現的「擴堂籌款爭議」等，執事通通有話事權。所以，遇著是開明的執事就話好彩，如果遇著經常堅持己見的人，就真係大都頭埋。
近日城浸就出現「終止終身執事制」的爭議，原因在於有該會會友認為「終身執事制」出現很多問題，例如限制新人參與教會管治的機會、強化舊有權力圈子對堂會事務的壟斷等等。會友於是發動聯署期望引起關注，但觀乎事態發展，似乎仍是無乜聲氣。唉，講到尾，咁樣提出法，會得罪幾多既得利益者至得架，邊度有人會睬佢呀。諷刺的是，耶教之父馬丁．路德明明就是改革先鋒隊長，但是跟佢既後人（即係我地呀）呢，就乜都唔可以改架啦。即係咁，個制度由馬丁．路德果刻開始，就一直咁完美架啦，我地呢D平信徒識條鐵棒咩（#曲）～
或者大家會問，下？做終身執事有權卻無錢收，要黎托呀？係架，你起教會「事奉」不能收分毫，但卻滿足左人控制大權的慾望，亦算是一種得益。更多是如果信徒在工作環境不如意，但番到教會卻有大權在手，多少滿足了人的虛榮心。情況就好似D男人在工作環境不如意，番到屋企卻可以控制老婆做呢樣做果樣，佢就自然從中獲得滿足感，是一樣的道理。亦有不少情況是做終身執事之人多已年邁或已退休，咁將管人的精力用在教會身上，亦是常見之事。
去到最後，究竟我有無咩結論？我旨在指出，教會裡面居然有D咁廢咁離譜的階級制度，令人相當無言。雖然一開始成立一個制度總有其原因，但是時代一旦改變，制度亦應有所調整，教會的迂腐不堪，實不亞於宗教改革時期的天主教。但教會要改，信徒要興起，靠的是自己，請不要期待身邊的人會成為英雄帶領大家前進。宗教如是、政治也如是啊。
沉默，只會讓教會繼續沉淪下去，不發聲的我們，也是幫兇……
Facebook：門徒媒體
節目：門徒公義
《門徒頻道》節目主持登記：http://goo.gl/forms/G2wusX1SVIzTa8KH3
《門徒媒體》作者計劃登記：http://goo.gl/forms/mS6LAL1cLzipo7ti1
「門徒」同工登記：http://goo.gl/forms/0JqwPOGw2nV9bLzm1
——————————
拒絕盲目跟從、堅持聖經公義！
