真係忍唔住要狠狠咁片佢一鑊甘的。
話說2017年就有呢舊「主愛臨香江」啦，根據其官網指，因為今年係選舉年，而當中因為政治的各項因素，掀起了社會很多的矛盾紛爭。「主愛臨香江」的作用就係要結集社會的關懷同愛心，減少仇恨咁話（有關本人對「主愛臨香江」之前的評論，可參閱再談主愛臨香江：大型佈道會的存在價值：http://www.vjmedia.com.hk/articles/2017/03/13/154800/ ）。其實活動當中的重點，不外乎是河蟹呀、愛呀、維穩呀乜乜乜。
但是呢，我真係太天真了，呢個「主愛臨香江」的陰暗面，簡直是「遠超我所想所求」添啦！咁究竟佢有咩罪狀呢？
罪狀就係：資金來源與用途不明、未有清楚解釋；欲蓋彌彰、愚弄信徒。
點解我會咁話佢呢？且看我慢慢表述。
首先，話說「香港福音盛會2017」呢個團體（你可視佢為一個獨立團體）有其官網，而官網之內一直放有旗下舉辦的一D活動。但是，細心調查之下，其實有幾個活動不曾浮過面，包括「香江愛宴迎福音」籌款晚宴、「愛臨香江拉闊金曲開心夜」籌款晚會、以及即將提到的「官商政演藝界異象分享會」。你要搵到相關活動的Link，亦不容易，要在官網的上方欄中按「簡介」－「大會活動概覽」－碌去下面先搵到。
好，我地都可以當是做呢個官網的人的技術欠佳就算啦。更何況其他活動佢都是咁顯示，我姑且當佢是整得衰就算。但上述兩個活動的性質，主要為「香港福音盛會2017」呢個團體籌款。網頁顯示了活動的內容，根據資料，籌款晚宴有1300人出席、籌款晚會則有1600人，絕不是一個少的數字。但，究竟籌得幾多善款數字？根據頭兩個活動的官網所見，並沒有顯示（及後再翻查其季刊等等，一概沒有顯示）。我查過相關資料，都未能搞清楚係咪只要是籌款，就一定要公開相關數目。不過，用常識去想，基於道德責任（仲要是耶教徒，係咪要對自己道德要求高少少？），很明顯都是公開好過唔公開呀嘛？！
另外很奇怪的，就係你睇TBB籌款節目，佢一定是畫公仔畫出腸咁「你睇下！！！～～～～呀乜乜乜捐左十八萬，無錯是十八萬呀！！大家俾熱烈的掌聲！！！！！！！」然後仲要整張人咁大的支票，荒死你D眼屎遮住見唔到佢捐左幾多架嘛。但是而家呢？「香港福音盛會2017」對捐款數字卻一概保密，但是又「明明地」籌款架喎！好野呀（俾D掌聲）～～ （#曲 ）
好啦，輪到呢個4月中旬完成的「官商政演藝界異象分享會」。大家可以睇睇以下呢張Poster，佢是有印到「主愛臨香江」的Logo，由此可判斷此活動是「主愛臨香江」的活動之一。
話說佢又黎借飲宴籌款啦，一圍$15000或者每位$1250，呢D恩典跳樓價，邊係我地D平民可以入去架呀，你諗多左啦。
奇就奇在，起「主愛臨香江」的主頁面，係好似刻意咁無公佈呢個籌款晚宴。明明是借「主愛臨香江」籌款，但是官網卻一隻字都無寫過！至今日，即係5月6日，我地見到在其官網之日的大會活動概覽頁同埋最新活動的一欄，呢個活動根本是好似無存在過咁呀！（http://hkgospelfestival.org/?page_id=1369 ）
（「最新活動」一欄中，並沒有顯示這個活動）
（連「大會活動概覽」一欄中，都完全無出現到）
咁我就嘗試用神秘學黎解釋一下呢個現象啦。其實是：神是要藉呢個神秘消失，證明呢個異象唔係人人都見到架。（#曲again）
好啦講笑，我地言歸正傳。咁呢個活動又是乜東東呢？根據前港姐張瑪莉Facebook公開的照片所見，已知出席這次「官商政紅」分享會的，包括財政司司長陳茂波、政制及內地事務局局長譚志源、偉易達主席黃子欣、南豐集團行政總裁梁錦松、蒙妮坦集團董事長鄭明明、立法會議員梁美芬、植麗素國際美容集團創辦人陳燕萍、全國政協容永祺、十優港姐麥明詩、藝人李彩華及張瑪莉等。
咁好啦，其實D「官商政紅」可唔可以Gathering下，分享下異象？梗係得，我地從來無限制過相關的自由。但是，第一、你地自己（殘廁？）Gathering無人可以阻你，但如果以全港性基督教活動名義去搞呢個活動，就好有問題。咁樣豈不是認同社會分有錢與無錢階級？有錢人的自己一檯然後講你地對香港的異象，呢個酒席，窮人俾唔起之餘、更加是連分享下對香港異象的權利都無，而可悲的是你地呢班有權者正正是操控權力的一群。第二、籌到幾多錢？款項會用黎做乜？零透明度。喂大佬呀，咩歡樂滿東華呀，人地唱緊歌時都起下面碌住Trailer有邊個邊個俾左錢啦，你地咁多「官商政紅」，俾左幾多錢、D錢點用，信徒完全是被蒙在鼓裡！講緊連影音X團呀，都願意公開盤數，呢個「香港福音盛會2017」籌左N次款，卻一次都無公開過盤數！
第三，點解呢個Gathering，完全無出現過起上述的官網呢？講緊是由佢開始都結束都無出現過喎！我唯一覺得合理的理由，就是唔想將D比較敏感、比較與政界（精確點其實是親中界別）緊密的活動顯示出來，惹人懷疑。你話，呢個可疑係咪真係好X可疑呀！而信徒嘛，都講左好多次，你話乜就乜架啦，亦從來唔會質疑你地呢D有身份階級的牧師乜乜。如此欲蓋彌彰、愚弄信徒，亦是事實。
回顧番我指出「主愛臨香江」的罪狀：資金來源與用途不明、未有清楚解釋；欲蓋彌彰、愚弄信徒。大家可以細心想想，我講的究竟有沒有根據，有沒有值得懷疑的地方。我起呢度亦正式言明，「香港福音盛會2017」請你地發出聲明，解釋清楚下列幾點：
1. 為何不顯示出相關活動的籌款數字，並請盡快公開相關資料
2. 網頁上的紕漏到底是什麼原因造成，是否有意圖隱暪事實
3. 團體是否願意承認針對性向某界別人士（如「官商政紅」或「專業人士」）籌款有造成階級分化之嫌的事實（而此亦與基督教的意向相違），並願意糾正方針，不再進行相關的活動。
雖然我知你地睬我都傻，不過，我還真的想起「神棍」兩隻字。如果我地唔想做人地眼中的「神棍」，拜託，收手啦！！！
Facebook：門徒媒體
節目：門徒公義
《門徒頻道》節目主持登記：http://goo.gl/forms/G2wusX1SVIzTa8KH3
《門徒媒體》作者計劃登記：http://goo.gl/forms/mS6LAL1cLzipo7ti1
「門徒」同工登記：http://goo.gl/forms/0JqwPOGw2nV9bLzm1
——————————
拒絕盲目跟從、堅持聖經公義！
