弟兄姊妹，主內平安，計埋今個主日，仲有三個主日， 今年2023年嘅教會年便會完結，我哋12月開始2024年嘅教會年了，我亦都在冤獄開始第四年嘅修練了。相信2024年我會開始第二次啡衫(即是再次定罪，成為囚犯，不是還押人士)，我心情興奮，因為時間不斷向前，要說謊言的人不斷說謊，仍未放棄自己人格的人仍然守住，而放棄自己人格的人，人人亦都睇穿。
(門徒事工急需事奉人手，誠邀加入！)
坐幾年冤獄，彷彿就是一種修行和試練。這一種修練，在修院、在船上、在寄宿男校的一連串修煉，都是為準備我下半生的日子。準備，是今日福音的重點，所以題目是叫大家加油。「香港人・加油」是今日講道的題目。生命的燈，要準備好油呀，朋友！請打開馬太福音25章1至13節， 十個童女的故事。好多信徒都聽過呢個故事，耶穌叫我哋要好好準備，我哋盞油燈要加好油，加足夠的油，好好準備佢再回來，好好準備佢未回來的日子，在這個邪惡充滿謊言暴力勞役的世代中，好好準備，不要成為我們所不齒的人，也不要犬儒地放棄一切美好和底線。
聖經話「那時」、「天國好比十個童女拿着燈等待新郎來到」。新郎來到，即係黎明來到，黎明來到，我哋都知道是什麼啊！「那時」即係幾時呢？冇錯，係「現時」，係「時時」，係「等待，並且準備黎明來到的時候」。即係現時啊。弟兄姊妹，即係我哋睇唔見希望嘅時候，即係我喺牆內，你在牆外嘅時候，即係遍地黑暗深夜嘅時候，耶穌要告訴門徒，他們要怎樣按照耶穌的受死和復活，來學習生活。「天國好比」呢個term，在馬太福音常常出現，我哋幾個月前亦都講過，「天國好像人撒種在田裏」，又講過「天國好像芥菜種」(芥菜我好like，鹹蛋肉片湯一流，四年冇飲了！ )「天國又好像酵母」。今日耶穌話，天國好像十個童女，各有一盞油燈，在深夜等待新郎來到。她們中間，五個聰明，五個愚蠢，分別係，佢哋有否準備足夠嘅油。仲有新郎遲來了，佢哋困倦，恰着咗，忽然間喺深夜，有人喊著說「新郎來了！」愚蠢嘅童女，發現自己盞油燈唔夠油，想向另外五個借，但借唔到，因為如果借咗比佢哋，自己就唔夠。嗰五個愚蠢嘅童女只好去買油，夜麻麻，唔知去邊度買？佢哋冇好似土匪強盜咁搶另外五個童女啲油，佢哋出去買，但係返嚟嘅時候，新郎已經到咗，筵席開始咗，門亦都上咗鎖，童女請求開門，但被新郎拒絕，仲話唔識佢哋添！
耶穌吩咐門徒：「要警醒，因為那日子那時辰，你們不知道。」如果天國要來，終極更新呢個世界，將不公義同邪惡者審判嘅話，我們唔係喺度等運到，我哋要警醒，天國因為耶穌已經來臨，並死在十字架上，而且復活，天國已經來了，這是基督信仰一個時間觀，既已成就，卻未完全更新，我們已經有得勝的把握，那些看似勝利審判我們的敗壞之人，其實它們才是被審判之人。
耶穌用新郎新娘婚宴去比喻，是希伯來先知傳統，先知批判國家，一直不忠於上主所立的婚約，不守承諾、違約，這個我們也感同身受，體會被人違約之痛，上主的痛，我們不難明白，但其實我們也見過不少背信棄義之人(俗稱二五仔)，相信你哋有留意上演嘅長劇，都知道到係邊啲人。我哋不用奇怪耶穌用婚宴來講天國嘅比喻，婚宴是喜慶的場合，但其中也有審判。正如10月15日的講章，那是王邀請人來參加兒子的婚宴，當中有審判。新郎喺意想不到嘅時候嚟到，那是一種無常，一行禪師說的，因為無常，所以有希望，我們能夠做的只有一件事，警醒加油，常作準備，而唔係等運到，在黑暗中，你一定要預備好燈，即使這盞燈，不足以勝過黑暗，我太like呢一句了，我重複：在黑暗中，你一定要預備好燈，即使這盞燈，不足以勝過黑暗。至於怎樣負責任地準備，如何為這盞燈加滿油？加啲乜油？加幾多油？這是人向上主的交代。
有些人可能認為耶穌的比喻不公平，因為那五個聰明的童女應該分享，憐憫那五個沒有準備好的童女。那些跟隨耶穌的人，被認為要去幫助別人，以致飢渴得餵養，旅客的接待，但這些善行所要求的群體，不能本末倒置。這群體首先必須是一個準備好以迎接作為新郎的基督的群體，才可做出那些善行，這是信仰群體與一般慈善團體不同的地方，最邪惡的權勢，也以慈善之名，做很多好事的啊！誰不會口口聲聲說關愛呢？我們要睇穿，並且堅守「只有基督可以叫客旅在世界裏得到接待，而這世界永遠會有另一個客旅需要得到接待。」我們要識得分辨。願恩惠平安，從三一上主歸與大家。願榮耀歸上主榮光歸香港。誠心所願。
作者：譚得志(快必)
原文
請支持我們的媒體＋露宿者工作：
門徒媒體
￭ Payme：55100852
￭ 轉數快：105276893
￭ Paypal：apostlesmedia
門徒事工
￭ 轉數快：105640551
￭ Paypal：apostlesministry
—————————————
拒絕盲目跟從、堅持聖經公義！
