快必講耶穌:權柄能力之辯證

0
77


同各位弟兄姊妹拜個早年,今日已經係年廿五,係立春嘅日子。如果今日出世嘅人,佢就係屬龍了。我係冤獄亦都過第四個農曆年,我唔會乞求大家嘅可憐,同耶穌一樣,更不會向極權暴政乞求,我係有脊椎嘅動物。

(門徒事工急需事奉人手,誠邀加入!)

今日亦都係顯現期第五主日,過埋下個主日,我哋就去到今年嘅預苦期,又係冤獄中嘅第四個預苦期。在冤獄與基督一同面對人間之冤,人間之苦,政權以權柄陷害人之苦,是最適合不過的。我經常提到德國神學家潘霍華話「在冤獄渡過聖誕節最應節」。佢當時喺德國納粹集中營,差少少就唔使被殺死,就係差嗰幾日,差過少少,同「安妮日記」嗰個安妮同佢家人一樣。人生好多時就係差嗰幾日,就係咁差嗰少少。

「我是最靠近人的上帝,不是遠離人的上帝,不是嗎?」耶利米書23章23節,佢個名稱為以馬內利,即係「神與人同在」。今日的福音係馬可福音1章29至39節,緊接上個主日,耶穌喺猶太人嘅會堂裏以猶太人嘅拉比角色教導人,聖經話佢嘅教訓唔同一般拉比,佢嘅教訓又新又有權柄,新同有權柄都係一種抗衡當時羅馬暴政嘅論述,新時代新征程,由治及興,呢啲都係政權嘅包裝,但呢啲唔係新,只係舊酒新瓶,無助無望,注定敗亡。

耶穌來到,顯出一種真正的新,像創造的新,有新眼光新生命的新,揭示一種歷史的新,生命的新,死人復活的新,前所未有的新,有權柄的新。今日立春,過年我哋梗係講「新」。聖經話佢嘅權柄連鬼都認識佢,鬼俾人知道,人比鬼敗壞,聊齋誌異都係咁講。「連污鬼都聽從了他」馬可福音1章28節話,人見到呢啲事,見到耶穌連鬼都對付到嘅權柄,就膜拜佢、仰慕佢,同今日冇分別,人膜拜權力權勢權柄,佢有權力權柄權勢,佢可以立法以法律為武器,坐喺高座之上教訓人,好有道德,被審判嘅人,就係呢一個setting之下,一定係錯嘅,仲要錯晒添,嗰個setting仲打擊人嘅信心,自信自尊自我都被剝奪,尤其係所謂「求情」嘅時候,被告因為喪失自我,以為噏一大堆廢話就可以被施捨減刑一兩個月,一切都係喪失自我被權柄踐踏玩弄嘅悲劇與幻覺!有脊椎嘅受造物,變成冇脊椎了,係權柄之下被扭曲。

冇錯,耶穌係有醫病趕鬼嘅權柄,主禱文天主經結尾都話「因為國度權柄榮耀,全是你的,直到永遠,阿門」而當晚,耶穌亦都醫好佢嘅門徒彼得嘅外母,之後好多鬼上身嘅人都去搵佢,佢只用一句話就趕走咗嗰啲污鬼,並且醫好一切有病嘅人。然而,耶穌運用醫治嘅權柄能力,佢係要付出代價嘅。馬太福音話呢度補充咗馬可,嗰度提到以賽亞書53章4節「祂代替我們軟弱,擔當我們疾病。」耶穌能如此,因祂既是我們,同時又不像我們,這關乎祂的人性,祂所展現的權柄與能力,是擔當我們的軟弱的能力,是與我們一同受苦的能力;祂的權柄,是無權力的權力;祂的能力,是捨去能力的能力;祂的自由,是捨棄自由的自由。

祂擁有的,不是政治權力那種屈人認罪踐踏人、扭曲人的權柄與能力;不是暴政動輒以法律去講大道理,什麼自由不是絕對;什麼你不能以你的自由去侵害其他人自由,那種似是而非的歪理,最終是政權有絕對自由,而所有人也只有二等自由,二等公民只有二等自由,好好!

但耶穌展現所顯現的自由權柄與能力,不是這些,不是醫病趕鬼,啲人趨之若鶩嗰種權柄同埋能力,佢所顯現嘅並且呼召我哋嘅能力,係擔當人軟弱與人一同受苦嘅能力。我哋受苦,佢都受苦;我哋被假髮演員踐踏,佢都被髮發演員踐踏;我哋被羞辱,佢都被羞辱。記得幾年前黑警有句名言「叫你個耶穌落嚟見我!」呢句話好配合福音書嘅情節啊,喔喔!耶穌就好似我哋一樣咁軟弱,同我哋一齊受苦,只係佢受嘅苦唔係好似我哋受苦嘅時候咁樣,將受苦變成暴力同埋操控嘅一種墮落形式,被我哋用嚟對付上帝,對付我哋自己以及我哋嘅鄰舍仲有親友,不斷折磨自己與別人。

有權柄能力唔代表乜嘢,呢啲係墮落腐敗以及引誘嘅同伴,知道軟弱,懂得受苦,處身卑賤之中,才找到救贖之道。呢個係今日嘅福音,彷彿預備我哋進入預苦期,亦都預備我哋繼續喺冤獄中捱落去。一息尚存,仍要如此。願上主與大家同在,願榮耀歸上主榮光歸香港。誠心所願。

作者:譚得志
原文

請支持我們的媒體+露宿者工作:
門徒媒體
■ Payme:55100852
■ 轉數快:105276893
■ Paypal:apostlesmedia

門徒事工
■ 轉數快:105640551
■ Paypal:apostlesministry
—————————————
拒絕盲目跟從、堅持聖經公義!